韓國工作假期之住宿（一）：考試院

來韓初期第一件大事，便是找個長期的落腳地。如何尋找長住的地方，其實也不太複雜。
外國人在韓的住宿，不外乎四類：考試院、下宿、share flat、one room。現在我們先講講最多人選擇的-----考試院。


1.考試院的由來
韓國的大學常常不夠宿位，所以在十幾廿年前開始，大學附近便陸續出現一些私營的學生宿舍，名為「考試院（고시원）」。間隔及環境其實類似香港的「劏 房」，但韓國的做得很有規模，而且是合法的，連看更都有！點解叫考試院呢？因為以前這種另類的學生宿舍，很多外省來首爾考試的學生會作短期住宿用，另外住 客通常亦是學生，終人在房內溫習準備考試，於是由此命名。但早期的考試院，環境好差，房內窄到個人轉身都轉唔到，現在新式的考試院就好好多，但直到現在韓 國人每每聽到「考試院」這個名詞便會皺眉了。今時今日，店名有「考試院」三個字的已經很少，只有很舊很老派的才會叫自己做考試院，新派經營的都會叫 「gosi tel（고시텔）」、「room tel （월름텔）」（食hotel的最後三個字母～haha）、「XX house（XX 하우스）」等。


2.房間的分類
考試院的房間，好比大學宿舍，不過房間分為若干種。「room（월름）」屬一人室，房內有獨立廁所。
「mini room（미니월름）」，一人室，房內無獨立廁所，需要使用房間外的公共浴室。
另外，有些考試院會提供有獨立廁所的二人室（이인실），但全部房型，都需共用廚房。而每種房型，亦分為「對外窗門」、「對內窗門」及「沒有窗門」三類。一般人室，面積由40至80呎不等，較大的可去到100呎。


3.價錢及服務
以新村及弘大為例，如果想要租間新淨D的「內窗mini room」，價錢由30萬(HK$2100)至35萬(HK$2500)不等；
一間「外窗mini room」由34萬（hk$2380）至38萬(hk$2660)不等；
「內窗room」由35萬(hk$2450)至40萬(hk$2800)不等；
「外窗room」由38萬(hk$2660)至60萬(hk$4200)不等。

另外，韓國大學生亦有另一種住宿，叫「下宿」，即類似寄住家庭，在host屋企租一間房住，廚廁都share，而「下宿」通常都包一日兩餐，所以作 為競爭對手的考試院，亦包食物，必備的有免費公仔面、飯、泡菜、咖啡及茶、冷熱食用水，有的更供應免費蛋或面包！但就要自己煮law~HAHA~可以說， 交左租，就一定餓唔死～～

除食物之外，其他必要的生活所需也會提供，如沖涼用的暖水、有線/無線上網、公用電腦、冷氣、地暖、房間內獨立小雪櫃、電視等。但要注意的是冷氣及地暖通常都係中央控制，未必全日開，租前最好詢問一日開幾多小時。


4.有用網頁
 在以下網頁，可以找到考試院，按你想住的地區劃分，熱門的地區有新村、梨大、弘大、明洞、首爾大、鐘路等地區。
「http://www.gosi1.net/」
「http://www.gosione.net/」


5.租住方法
 考試院網頁上的照片，通常比真實環境好十倍，所以建議大家一定要親自上去睇過先租。可以在香港時，先在網頁上 揀好一堆心儀的考試院。剛來到韓國時住一星期民宿，於是你就利用這一星期時間，逐間心儀考試院行一次，上到去同個看更講你想睇房，佢就會帶你去睇。睇o岩 可以即刻落訂，訂金由一萬至五萬won不等，到真正搬入去當日再比其餘尾數。又或你睇中時即刻比晒錢，都OK~考試院不用按金/保證金，有些會收取一萬 won的「鎖匙費」作為鎖匙的按金，退房時可以拎返。退房，一般幾日至一星期前通知就可以了，換言之，係可以隨時搬入，隨時搬走。


Copyright © 2013 阿妙韓國食記

考試院之「mini room」，無獨立廁所。

考試院之「room」，有獨立廁所。

一般考試院，住客都需要共用廚房。

走廊，像學生宿舍一樣。