阿妙韓國食記

上篇講完自學自考報考的考車方法，雖然係困難重重，但卻可以省去最多一半的費用，想起來還是有點心動的。 於是乎，我膽粗粗打算自己考，但去到場地試真的太緊張，一出發就失格~HAHA~然後我開始失去了耐性…立即又報駕駛學院去了。所以，我還是建議大家，用錢解決到的問題就不再是問題。 在駕駛學院考車 *****適合人士***** 1.韓文程度較淺之人士。有些學院標榜有中文教學。 2.怕麻煩之人士。因為學校職員會幫你搞晒所有野，你只需比錢同出現就得喇！ 3.持短期簽證人士，想盡快完成考試的人，最快一星期都OK! 4.手頭資金充裕，不介意比幾多錢。(補考費用是自己報考的兩倍) 駕駛學院的選擇 如果你沒有什麼所謂的話，其實可以任選一間。我見很多人就這樣揀在考試場旁邊的學院就算了。在我來講，我會上網睇睇各大學院的： （１）網友評論： 有些學院的師資不好，有些學院職員不友善，有些設備太舊，都可以從網友的BLOG中得知。 （２）離我家有多遠： 雖然大部份學院都會有接駁巴士每天接送，但我還是想找家離家近一點的。 （３）設備新舊： 雖說間間都差不多，但有Ｄ真係特別舊、特別冇客、師傅特別少。愈便宜的愈有這種傾向，有時要親自到訪才能感受到有幾舊。 （４）有沒有中文授課： 原本我擔心韓文上堂我聽不明白，所以特地選了離自己家最近而又有中文職員的。最後我卻用了全韓文，發覺自己的擔心是多餘的～haha~~一般韓文三四級其實足夠應付有餘了。 （５）路試難易度： 這是我後來才發現的！但已經太遲…… 駕駛學院的價錢 首都圈幾乎是公價，2019年價錢最平68萬，最貴約75萬，大部份都在 72-73萬 之間，即hkd5100左右。 以上費用包括： 3小時課堂學習 4小時場地試學習 6小時路試學習 場地試及路試的一次考試費 保險費用 費用不包括： 驗身費用 6000won 筆試費用 7500won 臨時駕駛練習駕照發給費用 3500won 正式駕照發給費用 7500won 共24500won ，你需要在各階段再付款。 而如果你場地試或路試不合格，需要再次繳交考試費，每間學院不同，約為 五萬至六萬won（hkd350-420）不等 。 所以，如果你在學院考車一次合格，所需費用為： 學院費用 730,000wo...

香港人跟韓國人結婚，最方便亦最多人採取的做法是，於香港婚姻註冊，再在三個月內回韓國的區廳申告婚姻關係（如果超過三個月，要罰錢）。 但，亦可以不在香港辦理，直接在韓國做「婚姻申告」。跟香港結婚不同的是，香港的註冊是個簡短但莊嚴的簽紙儀式，而韓國則是遞表申請的。所以，韓國婚姻申告完全沒有氣氛可言～ｈａｈａ 婚姻申告在「區廳」辦理，即類似香港的政務署一樣，每區都有一個。然而，韓國每個區廳辦事方法都有不同，所以，必需（是必需！）預先前往最近住所的區廳，詢問需要什麼資料。以下是仁川中區區廳的所需資料： 1.在香港申請「單身證明書」（即「寡佬證」），並需要公證及認證。首先，在香港的婚姻註冊處領取後，再到各區民政署宣誓，再去金鐘的高等法院加簽（即公證及認證的程序）。方法、費用及詳情，可瀏覽「香港政府一站通」網頁。另，單身證明可以拜托在香港的親人代為申請，但宣誓則要親自辦理。 2.戶籍表，香港人可用出世紙代替，副本就可以，因為收了不能取回。 3.以上1及2的資料，全部譯一個韓文譯本。 4.香港護照、香港身份證，正本。 5.韓國人一方的住民登錄證，正本。 6.申請表，可在所屬區廳索取。申請表需要雙方家長，以及兩名見證人的姓名、住民登錄編號、住址以及簽名等等。 7.帶齊以上資料，到最近韓國人一方住所的區廳，作婚姻申告，職員會即時核對及輸入資料，成功的話即時生效。三日後，便可到離家最近的「洞事務所」領取「家族關係證明書」及「婚姻關係證明書」，有了這兩個證明，才能進一步申請ｆ６結婚移民的簽證。 完成！是否非常簡單～ｈａｈａ

一般香港跟韓國人結婚，都會在香港韓國領事館申請f6結婚移民簽證，這是最快捷方便的方法。在香港申請的詳情及所需資料可瀏覽以下網頁（打開網頁後，選「中文」，即可看到）： http://hkg.mofa.go.kr/webmodule/htsboard/template/read/legengbdread.jsp?typeID=16&boardid=8962&seqno=717454&c=TITLE&t=&pagenum=3&tableName=TYPE_ENGLEGATIO&pc=&dc=&wc=&lu=&vu=&iu=&du= 但，如果你某些原因必需逗留韓國，其實亦可在韓國這邊的出入局申請ｆ６簽證。由於每家出入局的辦公方法都有不同，所以必需（是必需！）先前往最近住所的出入局，詢問需要什麼資料。以下是仁川出入局，於2014年4月轉新制之後，申請ｆ６的所需資料： 1.申請人的護照、申請表（可在網頁download）、費用 2.邀請書及背景陳述書（可在網頁download） 3.韓國人一方：住民登錄證、韓國的婚姻證明書、基本證明書、家族關係證明書（全部在就近的「洞事務所」申請到，即時可以領取） 4.外國人一方：自已國家發出的有效結婚證明書正本或副本，需翻譯成韓文。（如果沒有在香港註冊，需用香港的「登記事項證明書」代替，接受海外郵寄申請，申請方法在「香港政府一站通」網頁可找到。） 5.財政收入相關資料: >>本人和配偶的收入證明（由工作的公司發出） >>本人和家族名義的財產、存款證明、保險等，愈多愈好，有乜比乜 （本人和家族的一年收入，最少要有：二人家庭為15135091won，三人家庭為19579507won，四人為24023937won，五人為28468368won，等等。另，「家庭」的定義是，是在「家族關係證明書」上有名字的人。） 6.住屋登記證明的副本（全租、月租的租約，或買賣的樓契等） 7.韓國人一方為申請人寫的「信用保證書」（可在網頁download） 8.懷孕證明(如有) 9.二人感情生活相關照片，愈多愈好，有乜比乜（所有可以證...

不時有年輕少女們，會問阿妙及其他blogger 朋友，關於跟韓國男人交往的愛情問題。我們發現，這些女生都有共同的問題。 (一)唔肯放手 跟韓國男友拍拖拍得好辛苦，明知冇可能、冇將來，因為唔捨得，就是不願放手。男朋友係玩女王；男朋友父母唔鍾意外國人；男朋友成日玩失蹤……情況要幾壞有幾壞，但就係唔放手。因為「我驚分左手，搵唔到第二個韓國男朋友」，下？你又知？ (二)太快投放太多感情 有ｄ識唔夠一個月，就算未見過面係long d，都開晒facebook 記錄異國戀愛史，仲自行諗好晒將來會點。講真，就算拍拖頭三個月你都未必摸得清對方性格啦…… (三)分唔清真心假意 對異地戀，好不安，加上語言不通，成日分唔清對方講o既野係真定假。想分真定假…而家買名牌袋咩？睇男人，唔係睇佢真定假，而係睇佢對你好唔好。對你好的人未必係真心，但對你唔好的人一定係負心，這是硬道理。 (四)用錯方法 想搵個韓國男朋友做結婚對像，正路方法有好多，讀好韓文，再上網同韓國人做下語言交流、過來韓國工作假期、在香港找份韓國公司的工作、去澳洲讀書……諸如 此類。但很多時女生們就偏偏愛走截徑，落club 去酒吧玩溝仔apps……係好容易識到人呀，但需知道呢d途徑，都係玩家多，點會有真愛？ (五)太執著要搵一個韓國男人 世界上有三十億男人，中港台男人也超過六億，偏要找個韓國男朋友不可。講到尾，其實韓國男人都只不過係尋常人而已。 (六)存在太多幻想 有些跟韓國男人正在談一段長距離的戀愛之女生們，對韓國生活都是非常嚮往的。試過有廿歲出頭大學還未畢業的女生，問問題時寫住「正等待做韓國人妻，下個月 來韓國過試婚生活」，原來係為左男朋友所以過來小住，但唔識煮飯洗衫未工作過又唔識韓文，男朋友仲要未當兵……於是不斷請教各大版主如何在韓國生活……其 實，唔好諗咁多野，好好讀埋個書先啦～ (七)好在意對方快唔快覆message 人地得閒就會覆，唔得閒咪遲ｄ覆law，總之唔係唔覆就得啦。覆得快同慢，同佢係好定壞冇直接關係。唔好再在意佢快覆定遲覆，我其實真係唔知，你男朋友遲覆你message 係咪因為佢有第二個女人…… (八)關於見家長的問題 唔帶你見家長就驚人地對你唔認真，好快帶你見家長又嫌太快冇心理準備…… 想同你認真交往的韓國男人，應該好快會帶你見家長。因為需要確定佢父母係...

一連講左咁多關於上網/用apps 識韓仔之奇形怪狀，好似好灰咁！咁阿妙又唔係話一心要打沉大家o既，現實當中又總有成功例子。呢篇不如等我講，在網上/apps 認識，港韓戀成功例子比大家聽下，激勵一下大家的士氣～哈！ 實例一：facebook「 來自香港的韓國人妻 」 金師奶其實o係香港出埋書架喇。佢同老公係交友網認識，大家都有共同的宗教信仰，加上大家也不是十八廿二了，所以進展得特別快。而這個男人職業家庭性格外 貌都非常正常，而且有誠意，在認識不久已經做左好多野，每日打長途同佢傾計、又EMS 禮物比佢，仲同佢計畫將來。最初金師奶亦半信半疑，但三個月後這男人真的飛來香港跪地求婚，金師奶不理一切決心嫁去韓國，自始兩人幸福快樂地生活。金師奶 最近更加有喜，應該以後都在家中相夫教子做少奶奶。大家不妨去書局搵下佢本《我有一個泡菜老公》，睇下佢神奇的經歷。 實例二：facebook「 에바的港韓異國戀事簿 」 女版主跟男朋友在網上認識，起初大家都以語言學習為目的，但傾傾下日久生情……當中如何撻著的詳細野就唔講喇（因為阿妙都唔係好知～ｈａｈａ）。呢一年，她來到 韓國工作假期，跟男朋友活在同一天空下，男朋友的家人也對他呵護備至。有次update facebook fanspage，版主話男朋友帶佢出席家族活動（好似係阿爺生日定點）。男朋友在大家面前，拉住她的手走出來，跟大家說：「我向大家介紹，這個女人是我 的結婚對象，請大家多多關照！」親戚們即時掌聲雷動，真係拍韓劇一樣呀！甜到爆～～ －－－－－－－－－－－－－－－－－－－－－－－－－－－－－－－－ 阿妙結論：感情路上，你是獨行定係有伴，遇到的是好人還是衰人，條路係平坦定艱辛，最終能否牽手到老……所有都係命運，都係緣份。不用太緊張，最緊要開心。

前幾天，跟幾位「駐韓」的香港朋友吃飯飲野lady's talk。我們做了統計，在apps上認識到的韓國男人，拍拖拍得一兩個月，有七成都會奇奇怪，我們綜合了怪況如下： （一）玩失蹤 好好地，無啦啦唔見左人，完全失去聯絡。兩星期後，又突然出現。佢可能會解釋，「我唔見左電話」、「我入左醫院」、「我每日OT」諸如此類。其實，咁即係代表，佢心中冇你囉，咁仲唔明？人地見無聊冇野做，先紆尊降貴搵下你咋。 （二）借錢 認識不久的韓國男朋友問香港女朋友借錢，阿妙最少聽過五個case。找卡數、朋友有事、交學費、交租、買車、隻狗睇醫生、阿婆入醫院，可唔可以借住來先。 數量唔多，每次借幾千，但個個月係咁借就變幾萬，女人們因為唔想冇左個男朋友，通常「算啦，借啦」。請諗深一層，而家唔係問你借錢做生意幾百萬上落喎，而 係窮到冇錢開飯要問你借一千幾百o既男人，值唔值得呢？ 順帶一提，借左出去o既錢就唔好諗住拎得返，你人在香港，韓文又唔識多句，點拎？除非事先寫了借據，借據上需要有對方的姓名、住民登錄號碼、手提電話等資料及蓋章簽名，並要keep 低你匯款到韓國銀行的證明。這樣的話，可以報警處理。 （三）唔覆kakao/line/message 這是韓國男人（有或是所有男人？）的通病，鍾意就狂打比你、日日message你到凌晨。但又會無啦啦唔搵你唔覆message，又或你send 十個他才回你一個，女人們往往會心思思，完全佔下風。 （四）原來係有老婆或女朋友 有message 要掩住來睇，有電話來要行開先接，成日話見面又甩底，大時大節星期六日通常都消失，星期一至五先會同你約會。你漸漸會發現，其實佢係有女朋友/老婆的。 （五）得個講 常見於，剛剛上網識/交往無耐，你人在香港，聽見你話來韓國探佢，佢會話「我屋企有吉房喎過來住丫」，到你真係上飛機喇，佢先話「下，你真係來架？我屋企 唔得呀，你住酒店啦」。又或，原本message flirt 得好好地，聽見你要來韓國搵佢，約埋時間及見面地點諗住可以一見，但卻到當日又失去聯絡。 （六）當你係白痴 當外國人係白痴咁，冇讀過大學卻同你講「(全國第一的)首爾大學收左我架喇，我嫌遠唔讀咋嘛」，將近四十歲人得o個150 萬(hkd10000) 人工同你講「三星原本請我，我覺得錢太少所以唔做咋嘛」……講大話都講得聰明ｄ...

好喇，之前講了不少關於傳統韓國男人的性格特徵。 如果大家想接受挑戰的話，阿妙也不妨在此，公開一些識韓仔的apps比大家。 1. 너랑나랑 玩法：填寫自己的簡易資料，並可以set一條問對方的問題。之後就會隨機抽出兩位男人，你要「二揀一」，當然你揀人人也揀你，如果你揀的那個人選擇了別人 那你就輸了。直至你別同一位男士都選擇了對方到第二輪，系統就會向對方發問你先前set的那個問題（例如你可以問：你會說英文嗎？），看了答案後第三輪你 們也選擇了彼此，才可以開始對話。 以貌取人度：高（最好放一張最靚o既相上profile，不然你會冇人揀） 所需韓文程度：中級 仔仔質素：外表一般，通常絕大部份唔識英文，傾幾句就要約出來食飯。 評價：揀來揀去，亦可以睇到自己輸比邊個女生，增加趣味性。但玩得幾星期就會覺得煩。 遇到壞人的機會率：中  －－－－－－－－－－－－－－－－－－－－－－－－－－－－－－－－－ 2. E-PENPAL 玩法：填晒自己的資料，之後就等人send message比你，又或你可以揀人來send message，玩法非常簡單。 以貌取人度：中（需要填寫的個人資料比較詳細，樣子只是其次） 所需韓文程度：初級，或不需要。 仔仔質素：外表非常一般，有一半都識英文／中文，很多都是本身想學好外語、想跟外國人交朋友的韓國人。另外也有其他不同國籍的人士。 評價：玩法簡單，可以即時對話，是一個練韓文的好地方。可以看到對方更多資料例如年齡、興趣、職業等。 遇到壞人的機會率：中低  －－－－－－－－－－－－－－－－－－－－－－－－－－－－－－－－－－－－－ 3. BADOO 玩法：填寫個人資料，之後可以進行配對，系統會揀相比你睇，你中意的可以在「想見面嗎？」那裡揀「好」，之後對方就會知道你選擇了他，再進行對話。又或，可用「附近會員」，揀人傾計。但當然如果你身在香港，附近的可能都只是香港人～哈～ 以貌取人度：高（靚相非常仲要，放得愈多相愈多人ＨＩ你） 所需韓文程度：初級，或不需要。 仔仔質素：外表還可以，燕瘦環肥什麼類型也有，也會遇到識英文或中文的人。 評價：可以即時對話，對方的資料也詳盡，年齡偏大，三十歲以上人士較多。等。 遇到壞人的機會率：中高 ...

早前有朋友到韓國旅遊，在東大門遇到奇怪搭訕男，硬要請她去飲咖啡，又問她拿電話號碼，令她花容失色。其實 這個情況，在韓國見怪不怪，記得韓國男人的特質嗎？就是「乜都要快」同埋「進取」～如果你在這邊待久了，就會發覺韓男真的很喜歡在街上搭訕～阿妙本人以及 朋友們都有類似的經歷！ （在此先聲明我們都是外表普通的八十後女生啊，並不突出，而且地點都不是在club 或酒吧，而是大街大巷～） （一） 以前阿妙住東國大學附近，有天晚上十時多落街想買杯咖啡，過馬路時被一個三十多歲男人搭訕，說自己是東國大畢業生，在LG 工作的。阿妙說自己不會韓語，他隨即講流利英文，過完馬路後更抓住我的手不讓我走，他說只想跟我喝一杯酒，十五分鐘就走，隨即拉我到旁邊的炸雞店，跟他的 兩個朋友一起飲酒吃雞。結果阿妙，飲了一杯500CC 啤酒就脫身了~ （二） 有次阿妙在光化門附近，同樣是十時多，正想回家但突然下大雨，沒有雨傘在路邊等著，一個年輕人搭訕，邊傾邊拉阿妙到旁邊的煎餅店，吃煎餅及飲米酒，出盡甜言蜜語，最後雨停了，阿妙匆匆回家，他依依不捨但也沒我辦法～ＨＡＨＡ～ （三） 在新村地鐵站附近等朋友，突然有位貌似大學生的男子，說很想認識我，可不可以抽點時間一起去飲咖啡，阿妙就約了朋友沒時間，就走開開了。 （四） 在新村的咖啡店飲咖啡，同樣時貌似大學生的男子，原本只是問「這張椅子有人坐嗎？可以拿去嗎？」之後便搭訕起來，問阿妙拎電話～ （五） 在弘大跟朋友S，吃烤肉，位子很窄很迫，幾乎跟鄰桌是並排的。旁邊的是兩位中年男士，聲稱是建築公司的經理，不斷望住（靚靚的...?）阿妙及用爛爛的英 文搭訕，最後更問：「吃完烤肉，一起去另的地方飲一杯，如何？」阿妙說，不行了，很累，糾纏了一會，最後他放棄了～ＨＡＨＡ~阿妙自此被朋友S，封為「阿 叔殺手」。 （六） 在地鐵站等地鐵，一位中年男士，跟阿妙說「現在你去哪裏？回家嗎？跟我飲一杯怎樣？」幸好當時車到了，阿妙迅速就閃上了車。 （七） 飲半杯啤酒都會醉的阿妙，試過兩次，分別在烤肉店及廣藏市場，被旁邊的大叔請飲一支大啤及一支燒酒，點飲呀…… 其實他們未必有惡意，因為搭訕及飲酒已經是韓男生活的一部份。但來旅遊的女生們，遇到這些情況還是要小心保護自己啊，不要出聲，快快走開就可以了~~

近年因為手機apps 的興起，香港女人很易識到韓國男人，就算本身完全不會說韓語也好。以阿妙的觀察及經驗是，韓國是一個很排外的民族，跟香港不一樣，他們不易去接受外國人。 而且韓國人大多恐懼說英文，那為什麼這些韓男會選擇跟外國女人交往呢？這是一個很值得深思的問題。 阿妙就綜合了以下的幾項，如果，你唔識韓文而佢中英文又唔多好的情況下，佢地仲會揀你做女朋友的原因是： （一）他們在外國讀書、工作、生活過，又或經常跟外國人一起工作，不抗拒跟外國人交朋友，甚至中英文說得不錯的。這類是最常見亦最正常的。 （二）他們想學好外語，所以想以交女朋友這方法去練英文/中文，又或他的性格本身很喜歡結交外國朋友，增廣見聞。這類男人經常活躍於各大交友apps 之中。 （三）他們條件不好，所以找不到韓國女朋友，例如年紀大（如：就來四十歲，趕住要結婚生仔）、離過婚、樣衰或太矮、職業唔好（如：耕田之類）。這個也常見，他們通常會透過國際婚姻仲介，娶越南、印民、中國人等等。 （四）他們覺得未試過跟外國人交往，感覺很新鮮、新奇、有趣。這類以年輕人為主。 （五）他們覺得，自己可以識到外國女友好有型。這類以年輕人為主。 （六）他們在工作上、金錢上，想利用你達到一些目的。他可能知道你中文英文好可以幫佢應付公司客戶，又或知道你可以幫他開的公司拓展中港台市場，又或想靠 你問朋友借錢，又或做海外貿易的想靠你的中港人脈關係等等。這情況阿妙見得多，但因為這類男人的條件通常不錯（甚至可能已經有老婆仔女！），女人們很多就 這樣不能自拔。另外，阿妙聽過四、五個例子是，韓國男朋友問香港女朋友借錢，要佢地還就真係艱難了。 （七）他們覺得外國女人（尤其金髮碧眼一類西方人）思想開放，易得手。聽說這是很普遍觀念，常見於在酒吧、club 認識的韓男。 （八）工作太忙，很難識女仔，但又因為寂寞，所以試下上apps 識外國女人睇下得唔得。外國女因為語言不通，冇韓國女人又要哄要錫要諗將來咁麻煩。 （九）你真係靚到dum 一聲，所以對你一見鍾情。 總結，以上的一至五、八至九類都屬於正常及普遍，但六、七兩類就要小心。對阿妙來說，韓男跟港男一樣，有好人亦有壞人，實在不必對他們存有過份的幻想及期待。 可能你會覺得，阿妙好悲觀。其實將心比己，為何有些香港女生咁想搵韓國男朋友？也不外乎是這些原因罷。 ...

一年多前，阿妙來到韓國，其中一個最重要的目的是，想找個男人結婚生仔！～ｈａｈａｈａ～～但一年過去了， 發現其實韓國男人並不很好，最多只是外表身型比較突出而已。然而，因為被韓劇長期薰陶的關係，不少香港女生都夢想自己可以嫁過來韓國，並透過網上、手機 apps識韓仔。今日阿妙想講下，韓國男人的一些特質，讓大家在發展感情時，可以了解這些文化差異，小心交友。 韓國男人的特質： 1.乜都要快，相識、互相了解、表白、拖手，佢地都想盡量用最短時間去完成。於是，很多時，相識當日已經會問你「不如做我女朋友」，拍拖一兩日就會問你「不如我地去Motel 好唔好」。無論他們是好人還是壞人，性格本身也是如此急進。 2.行為好突然，不能用常理去理解。他們可以，昨天還是好地地的，今天同你say goodbye 話唔鍾意你；原本每日都講電話，突然有一日玩失蹤，完全唔打比你唔覆message，幾星期之後又會突然出現當乜事都冇發生過；今日鍾意哩個，總日突然唔鍾意，之類。 3.很進取，他們明白，想得到就要自己爭取，鍾意就去追求，所以如果他們對你有意思，攻勢可以是非常煩、強勁、令人招架不住的。他們不介意用任何方式去識女仔，所以網上搵女朋友非常普遍，這也是為何咁多港女台女都有個韓國男朋友的原因。 4.有很多韓國朋友都講過，有好一部份的韓國男人的思考方式，是「先上床後交往」。所以識幾日就要求發生關係這情況是相當普遍的（就連有朋友到慶熙學韓文，第一堂老師就這樣提醒各位女同學！）。 5.當你以為，佢帶你見阿媽，帶你見朋友，就等於肯定你女朋友的地位，那就錯了！在我所認識的朋友當中，見晒佢所有屋企人好朋友，不到幾個月話分手就分手的為數亦不少。只有當這個男人在中秋、新年或者係阿爺擺八十大壽時帶你出席介紹比人識，先真正視你為結婚對象。 6.真正非常大男人、會打女人的那種韓男，不常見，但骨子裏他們還是有點大男人的，例如，他們喜歡老婆留在家洗衫煮飯湊仔，不要求老婆出去搵野做，食飯唔 使女朋友比錢，會花錢買禮物比女朋友，這是因為，他們覺得「我係一個男人，唔使女人做哩ｄ野」。對我地女生來講，幾好丫～ｈａｈａ～（所以真係好多嫁過來 的港台女性自此成為少奶奶，越南新娘嫁比農村韓男ｏ個ｄ除外） 7.韓國男人如果到３５歲都冇拍拖、未結婚，係會被歧視的。首先大家會覺得佢地有問題所以先搵唔到老婆，其次在公司...