關於韓國男人（７）戀愛中的女生們之常見疑問

不時有年輕少女們，會問阿妙及其他blogger 朋友，關於跟韓國男人交往的愛情問題。我們發現，這些女生都有共同的問題。

(一)唔肯放手
跟韓國男友拍拖拍得好辛苦，明知冇可能、冇將來，因為唔捨得，就是不願放手。男朋友係玩女王；男朋友父母唔鍾意外國人；男朋友成日玩失蹤……情況要幾壞有幾壞，但就係唔放手。因為「我驚分左手，搵唔到第二個韓國男朋友」，下？你又知？

(二)太快投放太多感情
有ｄ識唔夠一個月，就算未見過面係long d，都開晒facebook 記錄異國戀愛史，仲自行諗好晒將來會點。講真，就算拍拖頭三個月你都未必摸得清對方性格啦……

(三)分唔清真心假意
對異地戀，好不安，加上語言不通，成日分唔清對方講o既野係真定假。想分真定假…而家買名牌袋咩？睇男人，唔係睇佢真定假，而係睇佢對你好唔好。對你好的人未必係真心，但對你唔好的人一定係負心，這是硬道理。

(四)用錯方法
想搵個韓國男朋友做結婚對像，正路方法有好多，讀好韓文，再上網同韓國人做下語言交流、過來韓國工作假期、在香港找份韓國公司的工作、去澳洲讀書……諸如 此類。但很多時女生們就偏偏愛走截徑，落club 去酒吧玩溝仔apps……係好容易識到人呀，但需知道呢d途徑，都係玩家多，點會有真愛？

(五)太執著要搵一個韓國男人
世界上有三十億男人，中港台男人也超過六億，偏要找個韓國男朋友不可。講到尾，其實韓國男人都只不過係尋常人而已。

(六)存在太多幻想
有些跟韓國男人正在談一段長距離的戀愛之女生們，對韓國生活都是非常嚮往的。試過有廿歲出頭大學還未畢業的女生，問問題時寫住「正等待做韓國人妻，下個月 來韓國過試婚生活」，原來係為左男朋友所以過來小住，但唔識煮飯洗衫未工作過又唔識韓文，男朋友仲要未當兵……於是不斷請教各大版主如何在韓國生活……其 實，唔好諗咁多野，好好讀埋個書先啦～

(七)好在意對方快唔快覆message
人地得閒就會覆，唔得閒咪遲ｄ覆law，總之唔係唔覆就得啦。覆得快同慢，同佢係好定壞冇直接關係。唔好再在意佢快覆定遲覆，我其實真係唔知，你男朋友遲覆你message 係咪因為佢有第二個女人……

(八)關於見家長的問題
唔帶你見家長就驚人地對你唔認真，好快帶你見家長又嫌太快冇心理準備……
想同你認真交往的韓國男人，應該好快會帶你見家長。因為需要確定佢父母係咪能夠接受外國人，你地先可以繼續發展落去，如果父母反對，就無謂再拖浪費你的時間，哩ｄ先係好男人呀！

(九)公主出城
有一個case，一個年輕而沒有社會閱歷的女生（是的，從來沒有工作過），遇到個疑似好男人的韓國，就話要來韓國做人妻。但個男人又顛埋一份，接佢返屋企 住，但冇計畫結婚架ｗｏｒ。來到不久，女生已經發現原來佢係超級大男人，好多野都唔夾，但因為愛佢（唉）……忍吧。自此女生就好似公主咁，韓文又唔讀、野 又唔做（因為冇簽證根本做唔到野），由朝到黑就係o係屋企HEA同跟住個男人。

咁舒適的生活真係，我都好想。但係，如果個男人飛起你，你就乜都冇架喇，返香港又比阿媽鬧，留o係韓國你又冇能力……同埋，乜事先，比人包養呀而家？自我增值下吧～

(十)講極唔聽
無論個情況有幾壞，無論身邊幾多人勸告過，女生都話「唔會架，佢好愛我，唔會咁樣對我。」我無野好講。由你啦咁～



唉~~姐妹們，共勉之啦。